ജനകീയ കരസ്പർശത്താൽ ധന്യമാകുന്നീ വിദ്യാലയം

ജനകീയ കരസ്പർശത്താൽ ധന്യമാകുന്നീ വിദ്യാലയം

കിളിമാനൂർ: ജനകീയ പങ്കാളിത്തവുംകൂട്ടായ്മയുടെ കരുത്തും കൊണ്ടു ശ്രദ്ധേയമാകുകയാണ് ഇവിടെ ഒരു സർക്കാർ പള്ളികൂടം.85 വർഷത്തെ
ചരിത്രമുള്ള പപ്പാല ഗവ:ലോവർ പ്രൈമറിസ്കൂളാണ് പഞ്ചായത്തിന്റേയും
നാട്ടുകാരുടെയും പൂർവ്വവിദ്യാർഥികളുടെയും സ്നേഹസ്പർശനം കൊണ്ടു ധന്യമാകുന്നത്.പഴയകുന്നുമ്മേൽ ഗ്രാമപഞ്ചായത്തിന്റെ 2011-12 ജനകീയാ‍സൂത്രണ പദ്ധതിയിൽ ഉൾപ്പെടുത്തി പപ്പാല ഗവ: എൽ.പി.എസിനെ മാതൃക വിദ്യായലയ പ്രോജക്റ്റ് തയ്യാറാക്കി ഈ പദ്ധതിപ്രകാരം 4 ലക്ഷംത്തോളം രൂപവിനിയോഗിച്ചു
കൊണ്ടുള്ള നിർമ്മാണ പ്രവർത്തികൾ പൂർത്തീകരിക്കുകയും ചെയ്തു.മാതൃക വിദ്യാലയ പദ്ധതി ഉദ്ഘാടനം നാളെ വൈകുന്നേരം 3 ന് ബി.സത്യൻ എം.എൽ.എ നിർവ്വഹിക്കും.വിദ്യാലയം മാതൃകയാകുന്ന പദ്ധതിയോടനുബന്ധിച്ച് വിപുലമായ ചടങ്ങുകളാണ് നാട്ടുകാരും പഞ്ചായത്തുചേർന്ന്സംഘടിപ്പിച്ചിരിക്കുന്നത്.21 ന് രാവിലെ പൂർവ്വവിദ്യാർഥി കുടുംബസംഗമം നടക്കും ഗൃഹാതുരത്വം ഉണർത്തുന്ന
ഓർമ്മകളുടെ കൂടിചേരലിന് “ഓർമ്മക്കൂട്” എന്ന പേരാണ് നൽകിയിരിക്കുന്നത്
ഒരു നാടിന്റെ സംസ്ക്കാര സൃഷ്ടിക്ക് നിർണ്ണായകമായ പങ്കുവഹിച്ച വിദ്യാലയമാണ്
പാപ്പാല എൽ.പി.എസ്.പരിപാടിയുടെ സ്വാഗത സംഘ രൂപീകരണ യോഗത്തിലുണ്ടാ‍യ ജനപങ്കാളിത്തം തന്നെ വിദ്യാലയത്തിന്റെ പ്രാധാന്യം വിളിച്ചോതുന്നതാണ്.പപ്പാല പ്രദേശത്ത് മാത്രം ഒതുങ്ങുന്നതല്ലാ ഈ വിദ്യാലത്തിന്റെ
സാന്നിധ്യം.മലയാളത്തിന്റെ പ്രിയകവി കിളിമാനൂർ രമാകാന്തൻ,കിളിമാനൂർ മധു,സാഹിത്യകാരൻ കിളിമാനൂർ ചന്ദ്രൻ,തുടങ്ങി സാഹിത്യരംഗത്തുള്ള പലരും അറിവിന്റെ ആദ്യാക്ഷരം കുറിച്ചത് ഈ പള്ളികൂടത്തിൽ നിന്നാണ്.ലോകപ്രസിദ്ധരായ ഡോക്ടർ മാർ.എഞ്ചിനീയർമാ‍ർ,പത്രപ്രവർത്തകർ,അഭിഭാഷകർ ,ജനപ്രതിനിധികൾ,ഒക്കെ ഈ സർക്കാർ വിദ്യായലത്തിന്റെ ഹൃദയസ്പന്ദനം തൊട്ടറിഞ്ഞവരാണ് എന്നതാണ്
വാസ്തവം.ഇത്തരത്തിൽ പ്രസിദ്ധരായവരെ ചടങ്ങിൽ ആദരിക്കും.തുടർന്ന് ഈ വിദ്യാലയത്തിലെ പൂർവ്വ ഗുരുനാഥന്മാ‍രെ ആദരിക്കുന്നതിന്റെ ഭാഗമായി “ഗുരുപൂജ’ എന്ന മഹനീയമായചടങ്ങും സംഘടിപ്പിച്ചിരിക്കുന്നു.അങ്ങനെ ജനകീയ കൂട്ടായ്മയിലൂടെ പൊതു വിദ്യാഭ്യാസ സംരക്ഷിക്കുവാനും നിലനിർത്തുവാനുമുള്ള
വിപുലമായ പരിപാടികൾക്കാണ് നാടിന്റെ ഹൃദയവായ്പ്പറിഞ്ഞ ഈ സർക്കാർ പള്ളികൂടം സാക്ഷിയാകാൻ പോകുന്നത്.പൂർവ്വവിദ്യാർഥികുടുംബ സംഗമം പ്രശസ്ത കവി കുമ്മിൾ
സുകുമാരൻ ഉദ്ഘാടനം ചെയ്യും മലയാളത്തിന്റെ പ്രിയങ്കരനായ കവി കിളിമാനൂർ രമാകാന്തൻ അനുസ്മരണവും സംഘടിപ്പിച്ചിട്ടുണ്ട്.വർഷങ്ങൾക്കുമുൻപ് വിദ്യാലയജീവിതത്തിന്റെ ഇടനാഴികളിലൂടെ നടന്നു നീങ്ങിയവരുടെ അനുഭവങ്ങൾപങ്കുവയ്ക്കലും വേറിട്ട അനുഭവമാകും